Tuchun Ah CDF le Kawl ralhrang Karlak ah kahdohnak a chuak tthan, CDF nih ralhrang hi zat an thah khawh hna. – Thawngpang Dik Thanh Hna Usih


Matupi-Paletwa Ramri Um SAC Ralkap Sakhan Cu CDF Nih An Kah Caah SAC Ralkap 2 An Thi. Chin ramkulh, Paletwa peng le Matupi peng ramri um Bawili SAC ralkap sakhan cu December 16 zinglei ah kan va kah i SAC ralkap 2 an thi, tiah CDF Paletwa nih cathanh an chuah.

SAC ralkap sakhan cu nawlngeihnak an lak hlan piin a rak um cangmi a si i, nawlngeihnak an lak hnu in thazaang tam ngai an chap. Cu sakhan cu Matupi le Paletwa karah a ummi a si i, a luancia ni 5 hrawng ahkhan kan rak kah bal. Kanmah lei in ralkap pakhat a nunnak a rak liam. Cun December 16 ah kan va kah ṭhan, tiah CDF Paletwa in ṭuanvo ngeitu pakhat nih a chim.

SAC ralkap nih hriamngan in an kan kah ko nain kanmah lei a thimi le aa hliammi kan um lo. Hriamngan an kah tuk caah Bawili khua le Twesaw khuami hna cu a himnak hmun ah an zam, tiah CDF Paletwa nih cathanh an chuah.

NUG Nih SAC He Cabuai Cung Biaruah An I Tim Maw?. Kan hnulei Dec 1, 2022 ah khan NUG caankarlak President Duwa Lashi La nih Reuter he tonbiaruahnak ah “Kan duhmi thil pa 5 hi an lungtlin ahcun SAC he biaruahnak ngeih khawh a si hnga” tiah a chim. Hi bia nih hin nunnak thap in dohthlennak a tuah cuahmah mi hna thinlung ah lungawṭawmnak a chuahter. A thin a hungmi le a ing a puangmi zong an um len.

Kan hnulei November 8 ah NLD Central Committee nih Myanmar buainak tuahremh dingah cun ramdang palai hna hi Suh Kyi he zalong tein an i ton lawngah a tlamtling lai tiah cathanh an rak chuah bal cang. Cu kongah soiseltu an tam ngai nain khatlei ah a lungtlingmi zong an um len ve.

NUG nih Sept 7, 2021 ah i runven kahdohnak (D-Day) a thanh hnuin ramchung hmunkip ah hriamtlaibu an dir i SAC cu an ngeihchun hriamnam hmangin an doh cio. Minung tampi nih nunnak an pek cang i tlaihkhih le hremnak phunphun a tuarmi zong an tampi.

Culioah NUG nih SAC he cabuai cung biaruah ding kong an chim tikah cheukhat an lau, cheukhat an khuaruah a har, cheukhat an thinhung. Hriamtlai mino tam deuh nih cun thisen leiba kongah biaruah ding a um lo (သွေးကြွေးမှာဆွေးနွေးစရာမရှိ) tiah an au ve.

NUG nih SAC hi bia kan ruah lai an tinak cu a si lo. Kan duhmi thil pa 5 an lungtlin ahcun cabuai cung biaruahnak ngeih khawh a si (Reuter nih a ṭialning tein Duwa Lashi La said the door was not closed to negotiation but the military had to stop killing civilians, vow to withdraw from politics and abolish the constitution that enshrines their power. Then, we would probably have dialogue,” he said) an timi khi a si.

NUG nih thil pa 5 an timi cu “SAC ralkap nih mipi an thahnawnmi ngol ding, ralkap cu ramkhel in kan chuak ko lai tiah biahrennak tuah ding, ramdang in minung hawi zawnruah bawmhnak kongah hnahnawhnak pek lo ding, 2008 phunghrampi hrawh ding le biaruahnak ah ramdang nih tlangtlak ding” ti hna hi an si.

Hi hna hi SAC nih an lungtlin ahcun cabuai cung biaruahnak kan ngei kho lai tiah NUG caankarlak President nih Reuter ah a chim. Hi thil pa 5 hna hi SAC nih pom ding cu a har ngaingai. SAC nih biaruahnak ngeih tikah zulh ding tiah an rak thanh cangmi a um ve. Cu chungah SAC hi hrawh lo ding, a aiawh zong ser lo ding, biaruahnak ah 2008 phunghrampi hi cherhchan ah hman ding” ti hna an i tel. Cucaah NUG nih thil pa 5 an timi hi SAC nih an pom lai lo ti a fiang ngai.

ASEAN palai nih NUG sinah an ruahnak a hal hna i NUG nih ralkap cu mipi uknak tangah chiah ding, ralbawizik Min Aung Hlaing zong thongthlak ding tiah an leh. Cu tikah ASEAN palai nih NUG dunak le SAC duhnak cu nichuah le nitlak bantukin an i hlat tiah a chim phahnak a si.

SAC nih nawlngeihnak an lak ni Feb 1, 2021 thok in nihin tiangah nunnak a liammi 2,500 leng, tlaihkhih a tongmi 13,000 renglo le thihdan pekmi 139 an si cang tiah AAPP cazin ningin theih a si. Cun ISP-Myanmar nih a thanh ning ah SAC ralkap nih inn an khanghmi hi 40,000 hrawng a si cang i ral hrial in a zammi nuai khat le sing ruk (1.6 millions) an si cang.

Hi vialte nunnak a liammi le inn-lo kan sunghmi hna hi cabuai cung biaruahnak men in cham khawh phun a si lo.

Cucaah NUG nih SAC he biaruah lam a um kho an timi cu a si kho lomi chunmang sawhsawh a si ko. Mipi le dohthlennak ralkap hna zong nih an cohlang lai lo ti a fiang. Cucaah kan ngeihchun hriamnam he Pathian i bochan buin hriamtlaih dohthlennak cu pehzulh a herh rih ko lai.

Salai CP Lian

The Chin Post Weekly Journal

Vol-1, No.18

 

 

 



Source link

Add a Comment

Your email address will not be published. Required fields are marked *