Tulio Bochan Bik Mi Tum Pahnih Ruahnak

Salai Lungthli Tum le Saya Van Tum ruahnak hi nan pom khawh ci phun a si maw? An nih pahnih nihcun raltuk an duh lo. Tei lomi ral cu doh loin um ding a si ko tiah an aupi mi a si.

Salai Lunhthli Tum nih tutan kan ram kong ah a ruah ning le a hmuh ning ahcun Kawl ralkap hi Chinmi lawng nihcun kan tei bal hna lai lo. Kum tampi chung kan tei bal hna lo caah kan kah hna ahcun kan mah tu kan fak chinchin.

Kawl ralhrang kah cu Khuaingal bu dai bamtuk a si caah dai tein um i a thli tein a cancan ah ramlak ah va kah khi a za ko ti kha a ruah nung a si. Cu pinah ralkap kut tang ah sianginn zong hi kai ding a si ko ti kha a ruah ning le hmuh ning a si. Kan fa kan nau le kum tamtuk chung sianginn kai loin an um te lai caah fimthiamnak ah kan hrawh lehlam lai ti kha a ruah ning a si.

Saya Van Tum nih a ruah ning zong hi kan tei lo dingmi ral cu tuk lo ding an si ko ti kha a si ve. Thantlang ralkap 200 hmanh kan tei khawh hna lo ahcun Kawl ralkap kah i thawh hi zeidah a sullam a um ti tiang ah ca a rak tial tu a si.

Zei thei lo huaha pawl nih CDF nan forh tuk hna ruang ah Thantlang inn zong tamtuk a kang tiah Saya Van Tum nihcun a rak tial bal. Kan tei lo ding mi hna kan ral hi cu doh loin um ahhin kanmah zong kan him deuh ti kha an nih pahnih ruah ning a si bik ko.

Mah hna pahnih ruah ninh hin cun a si kho lomi thil a si. Kawl ralkap uknak ah vawlei can dongh tiang Chinmi kha um thai peng dawh kan si ko. Kan tei hna lai lo tiin thut sawh ahcun vawlei can dongh tiang ralkap sal ah um peng ding kha a si ko cang.

Mizoram nih cu India rampi sinah cun kut tin tia te hmanh a tling lo. India ram map ah Mizoram khi a lang hmanh a lang kho huaha lo. Cu tluk cun India rampi sinah cun minung a tlawmmi le a hmemi te a si.

India ralkap cu an tam tuk le kan tei kho bal hna lai lo tiin rak doh loin um hna sehlaw a tu an dirhmun khi an phan kho hnga lo. Vai pawl sal ah an um peng rih ko hnga.

Sinain kum 20 chung ah biatak tein ral an doh. India ralkap a thawng tuk mi cu an don. Jet fighter le Helicopter in India ralkap nih an thuat peng ve ko hna.

Sinain kum 20 chung bak ral an doh tikah India ralkap an lung a dong cang i Mizoram cu luatnak an pek hna. Khi an dirhmun khi an phan. Mizoram cung ah India cozah nih nawlngeihnak pakhat hmanh a ngei ti lo.

Kannih Chinmi cu Mizoram mipi tluk in rak kan do rih naisai loh. Kan raldoh hu a nem tuk rih. Kan tuarnak hi a tlawm tuk rih. Kawl ralkap nih an celh tuk rih. Mozoram mipi tluk in ral kan doh ahcun Kawl ralkap nihcun an celh bal lai lo. Kan tei hrimhrim ko hna lai.Credit: Van Cung Lian

Be the first to comment

Leave a Reply

Your email address will not be published.


*