World Cup 2022: Minute 5 chung ah Italy chunmang a lo

World Cup 2022: Minute 5 chung ah Italy chunmang a lo
======================================

Vawlei cung khuacaan chiat le raal le rai lakah vawlei cung mipi nih kan i hngahhlang tawnmi kum 4 dan ah voikhat lawng kan zoh khawhmi World Cup kum kan phan than hoi cang.

Tutan World Cup aa phundang ngaimi pakhat cu November le December thla ah tuah asi lai. Aruang cu an tuahnak ding Qatar ram hi a linh tuk caah voi dang an rak tuah tawnmi thla May, June, July ah tuah awk a that lo caah asi. Tu kum hi team 32 zuamnak a donghnak kum zong asi ali. Kum 2026 US le Canada ram ah tuah te tikah cun team 46 an si cang lai.

A tutiang ah ram 17 an i fiang cang. Min thang ram an tambiknak le hmunhma tambik (hmun 13) a hmumi Europe ram hi hmun 3 a tang rih. Group thennak cu April 1, 2022 ah tuah asi lai.

World Cup tuanbia ah teinak hmu tambik asi vemi le a tulio Europe Champion asimi Italy an chunmang cu khuasik mang ah aa chuah ruangmang. March 24, 2022 Europe Play-off puai ah North Macedonia nih vangkhen in a thengh hna. Zu nih Chizawh a seh ti tluk asi. Bawlung ahcun Cakei asi vemi pehthliahmah tein voihnih World Cup i tel khawh lo cu ummmm. 2018 World Cup lio zong an rak i tel kho lo.

Italy hi World Cup suihrai (champion) voi 4 a la cangmi an si. 1958 in 2014 tiang hrelh lo in aa tel kho pengmi an si. Play-off puai ah Macedonia nih minute 90 a tlin hnu caan hlei pekmi minute 5 chung ah kawl 1 in an suut hna. Bawlung cu a pum le an ti theo bang minute 90 an chuih chung ah Italy nih fangvamh in an vamh len ko hna nain a donghnak ah Macedonia nih an inn cia le an lo cia ah an vamh hna.Credit-Ceumi Lian

Be the first to comment

Leave a Reply

Your email address will not be published.


*